"Булаг" гэhэн литературна кружогой 80-н жэлэй ойн баяр
Байгша оной апрелиин 19-ндэ Һүдэнтын дунда hургуулида үргэн дэлисэтэйгээр Бадма-Базар Намсараевич Намсараевай хүтэлбэри доро эмхидхэгдэhэн «Булаг» гэhэн буряад hайхан хэлэеэ, еhо заншалаа хүгжɵɵхэ зорилготой литературна кружогой 80-н жэлэй ойн баяр үнгэргэгдэбэ.
Саашадань Бадма-Базар Намсараев эдэбхитэйгээр ажалаа ябуулан, абьяас бэлигтэй шабинарые: Цырен-Даша Цымпилон, Владимир Намсараев, Батор Цырендашиев, Шуя-Ханда Базарсадаева, Рабдан Рабжуев, Болот Бальжинимаев, Базар-Сада Цыденов бэлдээ юм. Тэдэнь угсаата зонойнгоо алтан hургаал сахижа, эрдэм бэлигээрээ, уран үгɵɵрɵɵ нютагаа суурхуулжа ябаа бшуу.
Энэ дэмбэрэлтэй хэмжээндэ Бадма-Базар Намсараевай хүүгэдынь, олон тоото түрэлхидынь, нютагайхидынь, Агын тойрогой эмхи зургаануудhаа, жара гаран жэлэй саана кружогто ябаад, хурса гуурhаар түрэл хэлэн дээрээ шүлэгүүдые бэшэжэ туршаhан Батордоржи Будаев, Бадма-Ханда Батоцыренова болон буряад хэлэнэй аймагай багшанар холо ойроhоо сугларжа эдэбхитэй хабаадаа. Гэхэтэй хамта энэ хэмжээндэ Агын тойрогой толгойлогшын орлогшо, социальна һалбари хугжɵɵлтын дарга Билигма Будаева, Бүгэдэ буряадай «Толон» газетын ахамад редактор Цыцык Тумурова, Забайкалиин хизаарай Агын социальна һалбариин ажалтадай мэргэжэл дээшэлүүлгын институдэй ректор Лхама Рабданова хабаадажа, баярай бэшэгүүдые ба үнэтэ бэлэгүүдые барюулаа.
Кружогые мүнөө сагта саашань нютагай дунда hургуулиин буряад хэлэнэй ба уран зохеолой багша Мыдыгма Ринчиновна Балданова үргэлжэлүүлжэ, үндэр хэмжээндэ ябуулжа байhаниинь hайшаалтай. Энэ ажалайнь дүнгүүдынь заал соо үргэнөөр табигдаhан үзэсхэлэн үнгэрөө. Мун баhа hүдэнтын hургуулиин шабинарай наяад жэлнүүд соо зохеогдоhон, суглуулагдаhан элдэб олон найруулгануудые hургуулиин үхибүүд уранаар уншажа, сугларагшадай hонирхол татаа.
Удаань, «Тоонто нютаг» гэжэ аймагай hурагшадай хоорондохи уран уншагшадай харалган үнгэргэгдэжэ, эрхимүүд тодорон гараа:
-1-4 ангиин һурагшадай хоорондо Согто-Хангилай Цыдыпова Адиса, Гомбожапова Дари, Амитхашын Очиров Бато;
-5-7 ангиин һурагшадай хоорондо Үбэр Аргалиин Цыдыпов Балдандоржи, Хойто-Агын Цыренов Жаргал, Будаланай Бадмаева Аяна;
-8-11 ангиин һурагшадай хоорондо Һүдэнтын Санжаева Аяна, Шулуутайн Самбуев Амарсан, Шэнэ Орловскын Проскурякова Лидия.
«Шог егто зохеолнууд» гэhэн номинацида Гүнэйн дунда hургуулиин Зыдыгмаев Ананда «Мэхэтэй колхозник» гэhэн арадай аман зохеол уран гоеор наадан уншаад 1-дэхи hуури эзэлээ, 2-дохи hуури Шулуутайн Баиров Цырен, Хүнхэрэй Батоева Чимита Шуя-Ханда Базарсадаевагай «Гахайн тархи» гэhэн шог егто рассказ уншажа 3-дахи hуури эзэлээ. «ϴɵрын шүлэг» гэhэн номинацида Шулуутайн Жигмитов Согто ялас гэмээр тодоржо гараа.
Саашадаа «Булаг» гэhэн литературна кружогынь Һүдэнтэ нютагта бурьялжал, ургажа ябаа залуу үетэниие арад зондоо, эхэ хэлэндээ, тоонто нютагтаа дуратайгаар хүмүүжүүлэн, дүй дүршэлтэйгөөр hалбаржал, угсаата зонойнгоо hургаал дамжуулжа эдэбхитэй ябахань болтогой!
Ц.Ц.Цыдендоржиева